MAGSASAKA, DEHADO SA PLANONG IMPORTASYON NG SIBUYAS – IMEE

NAKAKAIYAK ang pasko ng mga magsisibuyas sa walong lalawigan kung itutuloy ng gobyernong Marcos ang planong importasyon ng sibuyas na kasabay ng mga anihan ngayong Disyembre.

Paliwanag ni Senadora Imee Marcos, handa na ang mga onion farmers sa Region 1 hanggang Region 3 sa anihan sa ikalawang linggo ng Disyembre, partikular na sa Ilocos Norte, Ilocos Sur, La Union, Pangasinan, Batanes, Nueva Ecija, Nueva Vizcaya, at Tarlac.

“Mahigit sa 43% ng pulang sibuyas ay maaani sa susunod na buwan at masusundan ito ng mga ani sa Enero mula sa Mindoro,” ayon kay Marcos na tumutukoy sa monitoring report ng Bureau of Plant Industry (BPI) ngayong Nobyembre sa mga nakatanim at mga nakaimbak na sibuyas sa nakalipas na mga buwan.

Sa nasabing report, inaasahang makaaani ng 5.537 metric tons (MT) ng pulang sibuyas sa Disyembre mula sa kabuuang inaasahang ani na 12.837 MT hanggang sa Pebrero ng 2023.

Pero, ayon sa BPI, ang inaasahang ani sa susunod na buwan at ang 13,043.37 MT na na-monitor na imbak ng sibuyas ay kapos pa rin para sa buong buwan ng Disyembre dahil sa matinding pinsala ng bagyong Paeng sa mga pananim noong Oktubre at pagsirit ng demand ng mga mamimili dahil sa Holiday Season.

Sa gitna ng mataas na presyo ng sibuyas sa mga pamilihan mula PhP280 hanggang PhP400 kada kilo, inirekomenda ng Department of Agriculture (DA) ang importasyon ng mga sibuyas.

“Nakakalimutan na ba natin ang ating mga magsasaka? Tinutugunan nga natin ang mataas na presyo ng bentahan para sa mga konsyumer pero, ano naman ang mangyayari sa ating mga magsasaka na nalulubog na sa napakababang presyuhan mula sa taniman na halos kalahati lang ng kanilang gastusin sa produksyon?” galit na tanong ni Marcos.

Ang farmgate prices ng sibuyas sa kalagitnaan ng buwang ito ay nasa Php25 hanggang Php27 kada kilo, kumpara sa Php45 hanggang Php55 kada kilo na inaapela ng mga magsasaka para sana makabawi man lang sila sa puhunan at abono, hindi pa kasama rito ang kanilang gastusin sa cold storage at utang.

“Ang importasyon ay naging bahagi na ng paulit-ulit na manipulasyon sa presyuhan ng mga negosyanteng kasabwat ng mga tiwaling opisyal sa DA at Bureau of Customs. Ang pagbubulag-bulagan sa hoarding at smuggling ang umiipit sa atin sa panandaliang lunas ng importasyon,” ayon pa kay Marcos

“Ang lokal na pananim ay itinatago para maging dahilan ng aritipisyal na kakulangan ng supply, pagkatapos ibinebenta naman kapag tumaas na ang presyo. Bumibili ang mga trader sa mga lokal na magsasaka sa pinakabarat na presyo at itinatago muli ang ani, habang ang mga smuggler ay kumikita sa mga misdeclared at undervalued na angkat na produkto,“ paliwanag ng Senador.

Idinagdag din ng chairman ng Senate Committee on Cooperatives na ang mababang kita sa ani ang dahilan para mapilitan ang mga kooperatiba na makipag- kompromiso sa mga trader na target magkaroon ng import permit, at kakapusin naman ang mga maliliit na magsasaka sa gastos para sa dry at cold storage na “kontrolado na ng mga kartel.” #FRNewsTV